Psa 73 | MMX | STEP | Moroa ga vukat tuturun tinotno ri leme Israel, la tinedi ua levempeeve atnedi i kasep.

Psalms 73

Levelinga Mokmokso At Ne Moroa

1 Moroa ga vukat tuturun tinotno ri leme Israel, la tinedi ua levempeeve atnedi i kasep.

2 Ketla nenia, aga auret tinotno xusu lesepsep sogo rak at ne Moroa gita xap; la lunuunu rak gita subu; 3 atla nenia ga bele mumuat tinedi digak lox aso, la at levenaleng aga reven levempanga gak sixit avukat tinedi limixin kapmek.

4 Dixo suma levesongsongot; ketla di lolos la dixok meres. 5 Dixong songot ngan lentaba luvuttadi ding songot kuren; Dixon tuuna bok tevenekarakat ngan leventaba vetpes din tuuna i. 6 Kuren la ding sigaara mi loklox aso i ngan levenonga di vonga i at lengkaka atdi, la ding siga bok leemusak mi leesep i ngan lengkontamon babaalom di vitis korop di min; 7 lempatpeeve atnedi ip kip soobang asu laxapmek, la levendoxoma atnedi ik lox angtang tinotno mi levendoxoma alipe xapmek. 8 Ding longon aksaksa ri limixin la di paase mumu levempanga xapmek. Dik lox aso la dik lox agagas li leventaangas kusu rik lox abaava lentaba vetpes. 9 Di paase vupu ri ne Moroa mo at lemenemen teren, la di paase asu avut lemet ti limixin at lavatbung menemen. 10 Kuren la limixin dinaba repukus ti mu asu di la di nuunu lolos tinotno at lempanga di paase i. 11 Mo limixin kapmek di tong i do, “Ne Moroa noxoklen i; la Leeme Avolo noxo long terek nedik.”

12 Limixin kapmek dik lok kerepmo. Di ruuna laxampanga solo la move dirak lok ka panga bok. 13 Kereva ba nenia, aga kok avukat gamasa mene lorooro rak, la agoxo lok laxapmek? 14 O Moroa, uga lox asongot solo ia at laxanaleng axap. At leven maxantamak amisik ugap sev asongor ia. 15 Do nia agita paase asu tevelinga vetpes kerekngan mo limixin kapmek, agitaba lox asuusu i do nenia xopmen lara atnedi limixin taram. 16 Aga lok tong pen i do ana doxoma mumu na lumumuat, ketla ga lolos tinotno ria ri lox akmokso i, 17 ga se at loxonaleng aga beles uto at loogu laplavang taram. Go ba i, aga long lenget ka ba i do lavanga salai mo naba vot atnedi limixin kapmek.

18 Unaba lok li di ro at lenep i gagai, la unaba lok nedi diba subu tup at leeteke! 19 Di naba pubeles soso mun at lesoxoreles; la laxavaxap atnedi, dinabap tava si rinotno uto xopok at loxot pis. 20 Dinabak lok ngan lapnobo i xap basinge lodoxoma at laradi at len maxantamak. La kerepmo bok at loxonaleng nenu, Leeme Silok, una beleku kaxat, dinaba sonao.

21 At levenaleng levendoxoma rak ga soogong tu la labalak ga mamao ru; 22 agang tangku ngan lavanga mi lavanuet kangkedek. A goxo xasep at lodoxoma ram.

23 Ketla nanga a nemen saparap amisix u, la um tebeng lakngak tino. 24 Um lam ase ia mi levenanasa ram la at laxavaxap teren, unaba siam ka ia mi leemi asu ram tia. 25 Nege bok ba nia a ruuna ka i ro at laxalibet? Nenu xusuk mun. At na levenaleng nenia a ruuna u, a vara bok ba tavanga sala i de at lavatbung menemen? 26 Do lodoxoma rak la labantuxu rak na molos, ne Moroa neni lolos tarak. Neni xusuk mun nia ak pakes tin.

27 Nedi di doxoma xepe u, ne Moroa, dinaba seeve. Unaba sele utut nedi di babala vukpux u mi lorooro atnedi. 28 Ketla nenia, i lox avukat tinotno atla a nemen saparap ne Moroa, ni Lurutu See Pa rak. Neni Leme Silok, Loorong Avolo. La i lox avukat tinotno bok mo do a paase asu lempanga axap neni gara lok pam i!